seni lenan ane melahan bandingang teken di Kupang. Nguda iraga ngaba gapgapan uli Timor Bu?"
"Baah, yen barang kerajinan lan kain-kain sajan liunan ada di Bali. Nanging iraga perlu ngaba barang ane asli uli Timor anggon temon-temon maka ciri iraga taen nongos di Timor. Buina satmaka iraga ngargain kasenian daerahe lenan ane tusing kalah luihne, sangkal ada istilah Bhinneka Tunggalika maka cirin demokrasi cara Indonesiane," kenten Ratna Dumilah nerangang saha meliang Meina kalong misi medaliun salib perak asetel. Sesampune suud mabelanja Gusti Ngurah nyetop bemo ane ngaba raganne ka Kreneng, lantas menek bus ane ngaba raganne ka Baledan. Jam telu makejang sampun napak teked di jeronne. Meina simalu tuun nyangkil Gung Nantha ane kari lelep sirepne. Gek Sri lan rakanne ningting bablanjaane tutuga teken rabinne natad tas pakean lan susu okane.
"Meina, kenken Gung Nantha enu sirep, sing repot keto ngurus ragane dogen Nyak nau rasanne malali di Badung?" kenten Gusti Biang Ngurah nyagjagin putunne.
"Nenten Tu Biang, Gung Nantha wau sirep ring montore saking Klungkung. Yen ring Badung ten meneng-meneng sami mainanne tagih ambila, di toko kasenian barange becik-becik pisan. Pantes torise demen malali ka Bali. Tiang tumbasanga kalong asetel," kenten aturne Meina lantas ka gunung rata nyirepang Gung Nantha. Wengine nika Gusti Ngurah lan rabinne mataki-taki menpen pakean okane saha gapgapan kanggen ninine. Manine semengan rombongane sampun sayaga lakar mamargi. Ibune masih sampun matangi nyediaang yeh anget putunne anggen maelap lan ngarya wedang kopi lan susu.
"Gek Sri, ene jajauli matah layuban usaba suba mairis aturin ninine. Raganne mula seneng ngajeng ane matunu timpalanga wedang.
305
