karumrum kasihasih. Sesampune montore maseret budal, Meina tolah-tolih dando-dando rembat tindakanne nutug Gusti Ngurah ka jeroan.
@@ & @@
Sorene nika sedek Gung Nantha sirep, Ratna Dumilah alon-alon nguris rambut okanne nganti bresih. Rambutne katanem di mrajan. Lantas dugase masiram ka ambuhin nganti bresih nyalig duurne. Gung Nantha sayan mungil, sayan gagah yen matopi, busan-busan usuhina duurne. Makejang dadi garegetan pada nyingakin polahne lucu.
Maninne Gusti Ngurah Darsana ajak rabinne, okanne, Gek Sri lan Meina lunga ka Denpasar. Pangojoge makejang ka dununganne Gek Sri masandekan. Gusti Ngurah dogen ane ka Kantor Daerah BRI apang tuara ngalikadin. Kabenengan liu ada kepala cabang ane teka mawanan liu ngajak ngobrol miwah nyalamin raganne indik pindahe ka Rababima. Jam dasa mara raganne maan kasempatan matemu teken Bapak Kakanda. Beh liu gati pituturne Bapak Kakanda indik tugas-tugas pokok ane patut ka laksanayang di Rababima. Nganti jam solas Gusti Ngurah mara mapamit uli kantor Daerah. Teked di dununganne Gek Sri, dapetanga okanne sedeng pajengina bubuh teken Ibunne. Sampun suud ngajeng bubuh lan pada ngawedang lantas mara numpang bemo ka Gajah Mada, mabelanja di peken Badung lantas ngajengang di restoran sawireh sampun tengai tepet. Suud ngajengang Gusti Ngurah ngajak rabi lan rombongane nyingakin barang-barang kerajinan lan mainan anak-anak di toko Jl Gajah Mada. Meina angob ningalin kaasrian tokone saha mendahan isin barang kaseniane uli togog, gambaran, kain songket, endek, batik, ukiran payasan emas, perak, tanduk, pendok, kepet, lan barang seni lenan.
"Bu Ratna, deriki magenepan ada kain-kain tenunan asli lan barang
304
