pasautne Meina saha ngusapin yeh paningalanne. Sawireh sampun tengai Gek Sri lan Ni Pudak sampun sayaga makta sodaan ka gunung rata. Meina masih ngenggalang milu ngambilang toya lan gelas inum.
"Nah, pak dokter, mangkin ngiring malu madaar sawireh niki sampun tengari. Kanggoang napi ja wenten. Deriki di bongkol gununge sajaba jukut-jukut ten wenten."
"Beh Gung Ngurah, tiang nenten madue manah malih jaga nulak napi ja paicene. Ledang kayun Gung Ngurahe sareng sami sampun tan sida antuk tiang ngawalesang," aturne dr. Nurja lantas mabriuk pada madaar. Sedeng melaha jukut ares lan sate dolonge ibi kari liu masisa. Gek Sri ngimbuhin baberok satmaka matuinget dr. Nurja di Selong.
Sesampune suud madaar lan mategtegan ngaroko saha nutur ajak Meina panakne ngempahang kangenne sawireh mara matemu, dokter Nurja lantas matur lakar mapamit.
"Gung Ngurah santukan sampun siang, tiang jaga mapamit. Keto masih cening Meina, legayang malu amone matemu, bapa lakar mulih malu. Yen cening suba matemu ajak beline sampeang salam kangen bapane. Yen ada galah pasti bapa nelokin utawi nelpon cening maka dadua. Nah, ene kanggoang malu anggon meli es dijalan. Selamet jalan anakku, Ooh Hyang Widhi kenten taler Gung Ngurah sareng Ibu, matur suksma sampun matemuang titiang sareng pianak titiange," ucapanne dr. Nurja masawang sendu.
"Pak, ... Oh Bapak matur suksma, tiang kari kangen teken Bapak."
"Nggih Gung Ngurah, Ibu, lan Gung Biang sareng sami tiang mangkin mapamit. Cara legu, mara wareg lantas magedi," kenten aturne dr.Nurja lan Nyoman Dana lantas majalan. Meina lan Gusti Ngurah ngatehang teked di montore. Makelo dr. Nurja meluk pianakne
303
