Ngurah.
"Ah, kanggoang ja ngiring Ibune, Ajine lan adine dogen kema. Nyanan di Sasak buin ngalih pangrenteb. Pan Kobar ajak kurenanne lan banjare ditu apang milu nututin. Ibu ngijeng jumah dini, adine Gek Darsini ngijeng jumah di Janaloka. Dumadak apang cening selamet teked di Sasak terus ka Bima," pasaut Ibunne tan mari ngusuh-usuhin putunne saha indenganga kangin kauh di natahe. Meina lan Ratna Dumilah sesampune ngejang tas lan bandarane lantas ka paon ngae bubuh, jukut, muah ngangetin darang nasi. Gusti Ngurah Darsana menpen panganggone di kopere dadi duang koper, lan barange lenan kawadahin dose mategul matulis rapi BRI Rababima. Suud masak Ratna Dumilah lantas majengin Gung Nantha bubuh, menpen bajun okanne mataki-taki apang ten kasep mani pasemengan majalan ka Padangbai. Kenten masih Meina matetamped apang ten ada ane kecag. Nyaluk sanja Gek Darsini mara rauh uli Janaloka.
"Oh, Gek Darsini ja teka. Kaden Ibu sing maan montor bane suba sanja?"
"Polih Bu, nanging majeljel santukan montore kari tuah asiki ane meriki."
"Kenken Tu Gek, napi payu milu ka Sasak?" Patakon ipahne ngoda.
"Beh, mbok ngae tiang bingung. Keneh tiange meled gati milu, nanging yen inget teken tugas tiange di sekolah dadi komandan regu, jumah di Janaloka dadi pangijeng tur ngarunguang ubuh-ubuhane liu. Melahan tiang durian dogen ka Sasak terus ka Bima."
"Nggih, mula keto. Patuta uli jani malajah matanggung jawab, mucukang encen ane madan perlu. Ten ja ngulah ngalih demen padidi,"
311
