"Nggih wenten Pak dokter. Bu, kaukin Meina ajak mai jebos mareraosan," kenten pandikanne Gusti Ngurah. Rabinne kapaon ngaukin Meina apang ka Gunungrata.
"Meina, tegtegang malu bayune. Jalan ka gunung rata matemu ajak dr. Nurja ane caritaanga teken mamakmu di surat wasiate. Dumadak apang sing ada masalah ane ngawe sungsut keneh Meinane. Taanang malu sedih lan kangene yen tonden seken Pak dokter Nurja ngakuin ragan Meina saja panakne," kenten Ratna Dumilah lantas pesu ngajak Meina. Sada alon Meina negak di sampingne Gusti Ngurah Darsana lan rabinne.
"Pak dokter, niki Meina Victoria ane tuturang tiang lewat telpon ipidan. Mangkin indayang bapak midenin kenken kayuwaktianne," kenten Gusti Ngurah papolosan. Pak dr. Nurja nguratiang Meina satmaka tan pakejepan. Di bibihne Meina ane setata meg marawat-rawat kenyemne Marieta Victoria. Amung paningalan, alis lan gidatne mirip pesan teken raganne. Paingetanne dadi nerawang ka masane ane sampun duang dasa tiban liwat.
"Sas ... saja cening pianak Marieta Victoria? Kenken khabarne jani. Ia makelo dadi perawat di Rumah Sakit Umum Selong lan sanjane nulungin bapak praktek jumah," patakonne dr. Nurja alon nungkasang mekek angkihanne saking trenyuh kenehne.
"Nggih Pak dokter, nanging Mama sampun ngalahin di watesan Timor Portugise, dugas tiang kari cerik. Papi kocap mati di Selong. Nanging dugas Meina ulang tahun ane ka pitulas, suster Ida ane ngajak Meina uli cerik maang surat wasiat Mama ane isinne ngawe atin Meinane bingung. Kocap Meina kari ngelah nyama, Lan Bapak Meinane ... sujatinne ....," Meina ten nyidayang ngalanturang caritane lantas ngeling sigsigan.
300
