"Meina, eda malu ngeling, apa dadi bapak malihin surat wasiat Mamane?"
"Nggih kanggena Tuagung, raganne sane makta. Napi dados Tu ...?"
"Nggih pak dokter, mangkin tiang nyemakang," pasaurne lantas ngambil surat wasiate saha foto-fotone makejang dugase Marieta kari di Selong lan di Kupang.lantas serahanga teken dr. Nurja. Alon dr.Nurja memaca surat wasiatne Marieta saha nguratiang foto-fotonne Marieta dugase ngajak Leonardo lan kurenanne di Selong, lan foto dugase Meina ulang tahun kaping lima di Kupang, nyihnayang yen Marieta suba beling dugase budal uli Belong. Saking sedihne, mara suud maca surate dr. Nurja lantas meluk Meina.
"Oooh Meina anakku, cening pianak bapa sayang. Bapa ane tusing ngelah tanggung jawab. Nanging kenkenang bapa nyen buin. Bapa ajak panak somah bapane malaib ka Cakranegara. Kaden ja Mamamu ngungsi ngajak papimu, Nak? Sukur masih bapa maan ngajak beline Leonardo milu ka Cakra. Nganti telu bulan bapa ngantosang, nanging papi lan mama mu tuara ada kabarne, mara lantas bapa luas ka Bali. Leonardo serahang bapa teken Pan Kobar ane bekung, lantas kaperas kanggon pianak, kasalinin adan ben Wayan Galang. Selanturne caritane Gusti Ngurah ane uning sangkala raganne ngajak cening milu mai jani," kenten tuturanne dr. Nurja ngusuh-usuhin pianakne kang kinasih. Meina tan pasaur, amung sigsigan ngeling ngelut bapane. Gusti Biang Ngurah, oka lan mantune milu kangen nyingakin patemun I bapa lan I pianak sedih buka kenten.
"Terus mangkin kenken paitungan pak doktere yen Meina mangkin sampun sinah mula panak pak dokter?" Patakonne Gusti Ngurah satmaka ngawakilin Meina.
301
