Ngurah Darsana, ane nelpun uli Atambua," raos timpalne.
"Oh, Gusti Ngurah, tiang Nurja. Ampura mara mangkin kapanggih," ucapanne dr. Nurja lantas masalaman. Gusti Ngurah saking senengne nandan tamiunne ka jeroan.
"Ngiring Pak dokter, Man Dana pada kanggoang deriki negak. Naah, niki ibun tiange, niki kurenan tiange lan panak tiange mara aoton,"Gusti Ngurah ngenalang ibune.
"Nggih, matur suksma. Tiang dr.Nurja karitenan Pan Kobar dumun ring Sasak. Mangkin sampun pensiun, mabalik mulih ka Singaraja," aturne dr. Nurja ngasab.
"Oh, derikian malinggih. Yen niki ja Man Dana mula mepes meriki uli dugase kari masuk ajaka panak tiange di SMEA Singaraja," panyapan ibunne. Ratna Dumilah makesyab mireng adanne dr. Nurja lantas nyledetin rabina Gusti Ngurah tahu taken sasmita lantas manggutan. Rabine kapaon nunden Gek Sri ngae kopi patpat.
"Beh, malunan Gung Rah nganten, buina sampun ngelah oka. Yen tiang kayang jani enu dadi bujang bingung, paling milihin kabake, makejang tepuk jegeg puk?"
"Araah, dasar bajul buntung, mapilih maboros kidang, bakatang bangkaan bengu. Pilih-pilih bekul, maan buah bangiang," pasautne Gusti Ngurah ngewerin timpalne.
"Nggih, sambilang wedange Pak dokter, Pak Dana pada. Kanggenang jajane kasela gunung," raosne Ratna Dumilah nanjenin tamiunne ngawedang.
"Gusti Ngurah, nyambung bebaose di telpon, napi sane nikaang Gusti Ngurah mangkin sareng mriki? Tiang nyud gati nepukin yen wiakti ipun mula pianak tiang."
299
