Sesampune suud ngorengin ebe lan ngangetin tumpeng lan katipat Gusti Ayu Sri lantas ngaturin Aji, Ibu, rakanne, lan Ipahne ngajengang di pewaregan. Usan ngajengang Gusti Ngurah Gede sareng rabinne mataki-taki lakar mantuk ka Janaloka.
"Yu Ngurah, sampun tengari beli lakar mulih malu. Padalem cerik-cerike ngurus siape ane mataluh lan siap potong ane patut madep mani. Napi buin yen payu kalahin ka Lombok, siape perlu sediaang pakan acukupan aminggu malu," kenten pandikan ipenne.
"Nggih Beli Ngurah lan Mbok Suci pada, tiang amung matur suksma. Yen Beli sareng Mbok payu luas ka Sasak, banggayang Gek Darsini ane ngurusang ubuh-ubuhane. Kaden mula sampun wenten kaula sane ngingonin, nawang tata carane ngubuhin siape."
"Tukang piara siape dong sampun wenten. Nanging, Gek Darsini perlu nabdabang indik pembukuane yen ada ane laku madep, napi taluh utawi siap potonge ane juanga teken langganane," kenten Gusti Ngurah Gede natad keranjang tututina teken rabinne. Gusti Ngurah ngatehang ajin lan ibunne pesu ka pamedale nganti maan montor ane muat raganne ka Janaloka.
@&@
Mara ajinne ngaliwat saget teka ada montor sedan mareren di arepan pamedale. Uli sedane tuun Nyoman Dana timpalne ane majanji lakar ngajak dr. Nurja singgah.
"Ooh, Nyoman ja teka. Kali kenken majalan uli Buleleng? Ayo menekan!"
"Semengan Gung, buka janjin tiange di telpune mabuaka cuti ngatehang Pak dr. Nurja mai jani sawireh Gung ngorahang jumah aminggu. Takut nyanan sing katepuk. Pak, kenalang ene suba Gusti
298
