kapungkur. Ngarorokang surya upacarane puput. Pedanda sesampune katuran ngawedang lantas mantuk. Sameton dadia ane rauh nebengin lantas katurin ngawedang. Ada masih ane ngambil jaja, biu, lan wohwohan. Be gulinge lantas kapurak katektek katebih-tebih apang sametone rata pada maan nyicipin pada mabedik matimpal nasi, utawi tumpeng cihnaning lega masemeton.
Benjangne semeng, sesampune Gung Nantha usan natab pucak manik pretanda upacarane sampun puput, Ibunne sareng Ni Pudak lantas ngetog bantene makejang. Gek Darsini mapamit malunan ka Janaloka sawireh lakar masuk. Gusti Ngurah Gede ajak rabine kari ngantiang layuban apang ada jotanga ring sametonne di jerone kangin.
"Beli Ngurah, Mbok Ratna, ampurayang tiang mapamit pang maan masuk latihan mabaris. Kayang Saniscarane tiang mulih buin yen Bliq Ngurah lakar luas ka Sasak," aturne Gek Darsini pamitan saha ngecup kaponakanne, Ibunne, Gek Sri lan Meina.
"Nah Jegeg maluan mulih, Ibu ajak ajine durinan apang suud matamped dogen. Kayang Sukrane beline, ipahe lan Gung Nantha masih apang maan nginep awai jumah di Janeloka, sing keto Ratna?" pandikanne Gusti Biang Suci ngasih-asih mantu lan okanne.
"Inggih Bu, tiang pasti merika. Benjang kari nangkil ring boss dumun ka Kantor Daerah BRI Denpasar. Titiang sampun majanji nglapor sadurunge pindah ka Rababima," kenten aturne Gusti Ngurah saha ngicen rainne bekel amun ane biasa kirimanga.
"Matur suksma Beli Ngurah, Mbok Ratna tiang luas mangkin," aturne lantas pesu karurunge natad tas. Gusti Biang Suci kari nampedang kranjang lan sokasi ane baktana ipoan, nanging sujatinne raganne kari kangen ngempu putunne. Saling genti anake lingsir ngindengang Gung Nantha nganti sirep di pabinanne. Meina lantas nyirepang ka kamare.
297
