Kaca:Gita Ning Nusa Alit.pdf/296

Saking Wikisource
Kaca puniki kavalidasi

Kemulan kapayasin mangda asri.

Gusti Ngurah Gede milu repot ngarya katik sate, pemanggangan siap, ancak, lan nyerut kelapa daksina. Bajang-bajange masih repot ngarya wedang kanggen patulunge sami. Disne ngajengang samian katurin ngajeng yadiapin amung mabe pesan karper, taluh pindang lan jukut-jukut dogen. Patulunge mragatang karyane satmaka di jeronne padidi.

Di dina Buda Wage Klawune, semengan patulunge sampun rauh. Ane lanang-lanang wenten ane nguling. Wenten ane ngolah dolong, ngarya sate, jukut ares lan serapah, minakadi manggang ayam. Patulunge ane istri-istri kari nutugang eteh-eteh bebantene sapuputa. Jam roras sami sampun puput matanding, lantas makejang katurin ngajengang. Suud ngajengang patulunge pada mapamit ngantos padanda rauh muputang karyane jam 3.00 sore. Gusti Ngurah Darsana, rabi lan okanne gelis masiram lantas mahias. Okanne ngangge wastra pasaluk nininne Gusti Biang Suci, kain sakordi matoros sutra Sasak saha klambi alit kain beludru biru. Nininne Gusti Biang Ngurah nyalukin gelang tangan lan cokor saha okokan emas. Makejang mrasa bangga tumben maduwe cucu turmaning lanang. Pekakne, nininne, ibu, aji, lan bibi-bibinne mapayas, pada garjita nyingakin Gusti Ngurah Anantha Bhuwana kenyem-kenyem ngembang payasne.

Sesampune pedanda rauh, upacarane lantas kekawitin saking Ida padanda mapuja, Ibu lan Ajine mabeakala, muspa ka mrajan nunas pasaksian. Lantas upacara tuun tanah, magunting rambute kawadahin blayag saha upakara kapendem ring durin Mrajane. Kalanturang maprayascita, malukat, lan majaya-jaya. Malih muspa lan nunas wangsuh pada, natab banten ayaban maka ciri nunas kaslamatan ring Ibu Pertiwi sane nuntun tur mebasang saking saluiring mala lan bayane


296