"Beh, tiang masih matur suksma. Mula penter mbok milihang warnan baju anut pesan teken kambene. Napi malih lengis miik lan sabune mamerk Marlin, waaah pasti pagaen dura negara utawi slundupan uil Timor Portugis. Adanne nongos di perbatasan," aturne Gek Sri lan Gek Darsini saha ngambu lengis lan matut-matutang kaine diraganne.
"Raris sapunapi Bu indik otonan Gung Nantha, titiang ten ngaturin napi-napi. Ituni ukuha numbas wohwohan ring Badung gelisan sore," aturne Gusti Ngurah alon.
"Hee, nguda ento buin kenehang. Ibu suba sayaga makejang lakar ngotonin cucun ibune. Uli dugase Geg Sri ngabarang cening lakar mulih Ibu suba masedia meli kucit, siap, nyuh, basa-basa, lan ane lenlenan. Ngae jaja, majejahitan ituni suba pragat kayang matur lakar nuur padanda masih suba. Nah mani enu meli wohwohan sajaba biu apang segeran ngenahne. Tingalin ja ento di bale bantene makejang,"pandikan ibunne ngusuh-usuhin putunne ane sampun nyriep di pabinanne lakar sirep. Ratna Dumilah nyangkol okanne abana ka kamar.
"Yen kenten ngiring ja merem Bu, manawi mbok Ratna, mbok Gek Sri lan Meina sampun leleh, benjang malih wawanin," aturne Gek Darsani lantas ka bale dangin tutuga taken Gek Sri lan Meina. Gusti Biang Ngurah nutug ka kamar apang maan malu nelokin putunne sirep, mara kalahina ka bale dangin. Bagia kayunne nyingak putunne aris pesan sirepne, tan mari mapitutur " Ning Ngurah ingetang menekang dupa satonden sirep."
Wengine nika bajang-bajange make tatelu sirep dadi akamar apang maan ngorta ngempahang kangenne suang-suang. Gusti Ayu Sri nyaritayang kenken pasawitrayan raganne ngajak Lale Dumilah, Luh Purnama, Made Sinar, lan Yan Galang dugase kari di Jeruk
288
