Manis Cakranegara, nganti patemunne teken Gusti Ngurah ane mula sametonne. Salanturne Meina nyaritayang kenken patamunne teken Gusti Ngurah ajak rabinne ane nuduk dewakne saha mukak sejarah hidupne manyama teken Wayan Galang, saking isin surat wasiat mamane ane madan Marieta Victoria. Pamuputne maketatelu dadi matetangisan inget teken panadian raganne suang-suang pada tuara seken uning teken rerama. Saling gelut kasuwen-suwen saking lelehne lantas makejang aris sirepne ngetut bungan ipianne suang-suang. Tan marasa matan aine sampun endag nyunarin jendelanne. Gusti Ngurah ajak rabinne nyangkil okanne kangin kauh di natahe mabaju dingin.
"Tuagung, nguda aeng dingine mangkin. Ipidan tan kakene meluangne?"
"Mula jani sasih dingin lakar nampiang sasih karo," pasaur rabinne nerangang.
"Bajang-bajange makejang tonden bangun, mirib kadung jaen sirepne. Tanginin ja Pudak!" Pandikanne Gusti Biang Ngurah teken Ni Pudak ane sedak nyampat di natahe.
"Banggayang ja Bu, padalem mirib raganne kadalon kadung nutur makewengi. Tumben matemu caritane biasanne ngalantur kangin- kauh," aturne Ratna Dumilah.
Jam pitu Gek Sri, Gek Darsini lan Meina mara pada matangi. Panyingakanne pada bangul, kubil cara anak suud ngeling. Matadah kabilbil ngenggalang pada ka kamar mandi masugi. Gusti Ngurah ajak rabi lan ibunne kenyem nyingakin bajang-bajange.
"Kenken Gek dadi pada kadalon sirep, nguda bengul, ngeling kenken?"
"Ah ibu, sira ngeling. Napi pangelingin tiang. Malah bagia matemu
289
