Galang sane bakatang tiang di Kupang," pasautne Ratna Dumilah. Meina nyalamin Gek Darsini.
"Ooh, Yan Galang kari ngelah adik. Kaden Made Sinar dogen nyamanne. Yen kenten Mamakne dija mangkin?" Patakonne Gek Darsini nyujutang.
"Mama tiange sampun padem Tu Gek. Tiang mangkin anak yatim piatu mawinan mangkin ngiring Tuagung lan Bu Ratna meriki. Meled nepukin belin tiange di Sasak," pasautne Meina masawang sendu. Gusti Ngurah Darsana sampun rauh ngaba barangne tulungina teken Ni Pudak lantas celepanga ka gunung rata. Koperne Meina lan tasne Gek Sri abana ka bale dangin. Gusti Ngurah lantas meluk rainne, Ibunne saking tulus baktine.
"Ooh, selamet cening nyidang pindah maekang lan menek pangkat. Nyen nawang buin pidan maan di Bali apang paekan, sawireh Ibu suba sayan tua," pandikan Ibunne. Gek Darsini, Ni Pudak lan Meina ngenggalang ka paon ngae yeh anget lantas nyediaang rakanne, ipahne lan Gung Nantha apang masiram utawi maelap. Sesampune pada usan masiram makejang lantas ngajengang di gunung rata. Wengine nika tumben karasa rame di Jero Kawan. Napi malih okanne tumben dereng merem, satmaka dadi bungan jerone. Ratna Dumilah lantas mesuang gapgapan aturina Ibunne kamben lan selendang, Gek Sri lan Gek Darsini ngicen kamben lan kain baju, lan sabun saha lengis miyik Marlin.
"Kanggeang Bu, Tu Gek pada tiang ten makta napi ane pantes anggen gapgapan."
"Ah, ento kone sangetang. Yen cening nyidang mulih dogen Ibu suba demen. Apa buin ngaba kain asli tenunan Timor, mula melah mirip pesan gringsing Tenganan."
287
