Ratna Dumilah matakon alon.
"Bah, melahan antiang malu jebos. Beli suba mabesen apang papagina teked dini. Yen iraga majalan nyanan maselewanan di jalan, payu dadi saling alih. Matur suksma nggih dik, tiang sampun wenten ane mapagin," kenten Gusti Ngurah matadah bingung ngalih-alihin rainne. Gek Sri alon-alon mukak topinne, mapi-mapi menahin kacamatanne lan nyuahin rambutne, lantas makenyem manis nyapa ipah lan rakanne.
"Beh, mara atiban tengah mbok ajak Beli Ngurah saget engsap teken tiang. Napi saking tiang ane sanget masalin?" Kenten Gek Sri ngubah suaranne maka jati mula lantas ngelut ipahne nyangkol Gung Nantha ane nyerah makenyem manis di pelukan bibinne. Ratna Dumilah lan Gusti Ngurah masuryak seneng milu ngelut lan ngecup Gek Sri mara kena baana ngingetin rainne ane nyaru dadi sopir taksi. Meina milu bengong, bingung.
"Oh denda sayang Gek Sri, mula penter sida nyamar. Pantes Gung Nantha uli tuni kenyem-kenyem nepukin pak sopir. Mula anake cerik ngambu-ambu bonne."
"Beli masih uli tuni pangling, marasa-rasa taen nepukin sopire tenenan, nanging masak sopir kok cara bencong? Nah Gek Sri kenalang ene Meina adinne Yan Galang ane tuturang beli di surate ipidan," pandikanne Gusti Ngurah ngenalang Meina teken rainne.
"Ooh Meina selamat matemu dini di Bali. Tiang mula matimpal leket ajak beline, dugase di Cakra tiang ajak Mbok Ratna lan Luh Purnama nongos di samping umahne. Ah, Meina cantik ya mbok Ratna, mirip ajak Made Sinar, amung landungan buin bedik." Kenten Gek Sri saha ngelut lan ngecup Gung Nantha ane nalekep dipelukanne. Gusti Ngurah mayah ongkos buruh saha ngaukin taksi ane parkir di arepanne.
283
