malu," pabesen rabinne lantas ka portir tongos barange teka. Ratna Dumilah pesu tutuga teken Meina ane natad tas dadua magrendotan kipak-kipek ngalih-alihin Gek Sri Wahyuni ana mapagin. Gek Sri ane uli ituni ngatosang disisi mabuaka mengkeb apang maan nyanden ipahne.
"Om Swastyastu. Taksi, ngrereh taksi Bu, majalan mangkin?" patakonne Gek Sri ane macelana panjang, matopi, lan makaca mata selem, magaya persis cara anak muani.
"Ooh maaf, tiang kari ngantos kurenan tiange nyemak barang derika," kenten Ratna Dumilah matadah kabilbil nepukin sopir taksine ganteng tur gondrong nyapatin. Kenten masih Meina milu bengong nepukin abah sopir taksine someh tur luwes.
"Ten sapunapi Bu, ngiring derikian malinggih di bangkune!, Malih jebos bapak pasti rauh," pasautne saha nyemakin tas uli limanne Meina.
"Aah, biarin. Tak berat kok Mas," pasautne Meina ngatepekang limanne Gek Sri ane matadah nakal nandan Meina ka bangkune negak.
"Ooh yen kenten biar si gagah niki dogen sareng Oom, ayo? Mriki cah ganteng?" Gek Sri ngenjuhang tanganne nyemak Gung Nantha, nanging kelidanga teken ibunne. Raganne mrasa takut okanne nyanan culika, sawireh tumben nepukin sopir taksi someh gati! Gung Nantha malah nyujuh, kenyem-kenyem nyingakin kacamatan sopir taksine.
"Trima kasih Oom, malih jebos ajin tiange rauh," pasautne masaang okanne. Uli pintune Gusti Ngurah pesu norong kreta bek misi koper ngojog rabinne malinggih. Gek Sri majujuk makenyem nyingakin rakanne. Gusti Ngurah milu makenyem tur manggutan.
"Tuagung, niki kabenengan wenten sopir taksi. Napi iraga perlu ngantosang Gek Sri malu, napi langsung ka dununganne Gek Sri?"
282
