"Suster, saha timpal tiange makejang, nunas ampura tiang pamit mangkin ngetut sapituduh surat wasiat mama ngalih beli lan papa tiange, madak sida matemu."
"Oh sayang Meina, dumadak Tuhan Yesus lan Allah Bapa di surga setata ngicen kamu kaslametan, Amin. Yen suba katemu jangan lupa ngabarin kitorang," sautne suster Ida. Meina, Gusti Ngurah lan rabinne masalaman lantas mapamit nerusang pajalanne ka Bandara. Teked derika dapetanga Kepala Cabang BRI ne sepulo Timor sampun pada ngantosang. Bapak Y. Bada ngabaang tiket lantas naftarang barang-barange ka loket. Makejang lantas malinggih ngobrol sambil ngantiang galah kapale nambung. Ibu-ibu kurenan kepala cabange makejang demen ngulgul Gung Nantha ane abina teken Meina. Jam satu siang uli pangaloane kawedarang apang panumpange makejang menek sawireh kapale enggal lakar mabur. Gusti Ngurah lan rabinne mapamit teken timpal-timpalne, pada masalaman saling maaf-memaafkan utamanne ajak pegawene ane bareng ngatehang, lantas magegas menek ka pesawate budal. Sesampune pepek muatane lantas kapale nambung, ngambara ninggalang gumi Timore, sayan makelo sayan rawit nganti ilang tan parawat matra. Kabenengan pesan panumpange makejang puluk ka Denpasar mawanan pesawate tuara buin singgah kija-kija. Kalangen pesan Meina ningalin pulo-pulone alah sambehang di pasihe. Jam telu mara pesawate malabuh di Bandara Ngurah Rai di Bali.
Alon-alon panumpange lantas tuun uli pesawate. Ratna Dumilah nyingal Gung Nantha, Meina, lan Gusti Ngurah natad tas misi susu kayang pasalinanne Gung Nantha, menek ka buse ane ngaba ka terminal domistik, mara tuun kasambut gending lelambatan.
"Bu, ajak malu Gung Nantha lan Meina pesu! Nyen nawang Gek Sri suba teka mapagin di wangan. Beli enu nyemak barang-barange
281
