kari ngeles plangkirane tur kacelepang di petine ane lakar makirim ka Rababima. Suud nika raganne lantas ka natahe menahin tetaneman, ari-arin okanne karataang tur katanemin bintak apang saru. Tanahne kajumput kawadahin kain putih lakar baktana ka Bali satmaka ngisidang ari-arine. Okane masih katangiang, kaanggoin baju anget. Sesampune pada suud mapenganggo Gusti Ngurah ajak rabinne muspa satmaka pamamit ring sang maduwe linggihe, lan nunas ring Ida Sang Hyang Widhi Wasa mangda selamet rauh ring Bali tur ngraris pindah ka Rababima.
Jam 4.00 barang-barange makejang sampun menek ka montore. Ada ane menek ka montorne Gusti Ngurah ane lakar ka Bandara, ada ane menek ka montore ane lakar ngirim liwat Ekspedisi ka Rababima. David lan Pak Markus sampun ngurusang makejang. Sesampune nyerahang sereg umahe teken Pak Markus, Gusti Ngurah ajak rabinne lantas nyalamin pegawene ane teka ngalepas raganne. Rombongane petang montor lantas majalan alon-alon ninggalang kota Atambuane ane kari sepi masaput sayonge dingin. Yosef tukang kebune ane tundena majaga negak ngisi bungkusan ane baanga teken Ratna Dumilah di terase. Isin bungkusane tuah piyama asetel, trening duang setel, pakean dinas a setel saha kamben lan anduk. Makejang mula pakeanne Gusti Ngurah ane mara anggena aminggu pinaka temon-temon. Padelengdeng yeh paningalanne Yosep narima.
Tan caritanan di jalan saking gelis pajalan montore, jam 12.00 saget sampun teked di Kupang lantas ngojog ka panti asuhan ngatehang Meina apang maan mapamit teken Suster Ida lan timpal-timpalne. Tuah limang menit Meina numplekang rasa kangenne teken ane miara dewekne uli cerik, lantas saking berat ati ia ngeles pelukanne suster Ida.
280
