"Bu Ratna, tiang mrasa kari kuangan galah masawitra. Mrasa mara ibi ibu deriki saget sampun budal. Mara keneh tiange eneh madan bisa makurenan saking pitutur lan tatuladan Ibu mangkin saget oh ... Ibu, ... sst?!" aturne Ibu David ngeling sasenggukan.
"Bu, yen umur wiakti Ibu kari nguda, nanging pangalaman Ibune tur kayun lan laksanan Ibune buat ngurus kulawarga patut dadi tatuladan kitorang sami," raosne Ibu Markus ngalanturang saha ngelut Ratna Dumilah. Kenten masih tamiune ane lenan pada nyalaman Gusti Ngurah ajak rabinne lan Meina. Ane sidori budal tuah Cik Amio lan Pak Made ajak kurenanne suang-suang, sawireh nyambilang ngaba prabotne Cik Amio.
"Matur suksma Pak Made, Cik Amio lan ibu-ibu, dumadak mani puan iraga sida matemu di Bali". Utawi yen ngaliwat ka Rababima ingetang singgahin tiang derika!
"Beh, sepanan janjin tiange lakar ngebat jumah. Nanging yen Pak Ngurah wenten karya di Bali dados masih koling-koling, kitorang deriki sopasti dateng. Selamet jalan," aturne Cik Amio saha nyalamin Gusti Ngurah, rabinne lan Meina saking welas asih.
"Nggih Bapak lan Ibu pada tiang pamit mani jam 4.00 uli deriki. Slamet tinggal," pasautne Gusti Ngurah saha ngatehang tamiunne nganti ka pamesuane.
Petenge sayan sepi, sesampune suud matamped munduhang barang-barange ane lakar maba ka Bali di kamar tamu, makejang lantas ngojog kamarne suang-suang, sirep. Saking lelehne nganemin tamiu, ajahan sampun pada engsek sirep aris pesan.
Jam 3.00 Gusti Ngurah sampun matangi lantas nundunin rabinne lan Meina apang pada mandus lan mataki-taki lakar luas. Gusti Ngurah
279
