Kong Amio tragia nyodaang ajeng-ajengan di meja makan. Gusti Ngurah ajak rabinne dadi bingung, kimud ten ngerti lakar ngomong napi. Kenten masih Meina ane tundena nyodaang milu trenyuh.
"Beh Pak Made, Cik Amio, nyen ngelah gara-garane tenenan? Dadi tan pasadok sampun ngaba magenepan. Nak kenken-kenkenan ene? Ajin pada teka dogen tiang suba lega. Yen kene berat rasanne keneh tiange lakar magedi uli dini," baosne Gusti Ngurah.
"Waduh Pak Ngurah, tuara ada artinne tiang amung nyediaang sawentene anggon nyuguhin tamiune. Tiang sampun uning barang-barang Pak Ngurahe sampun tingkes tur yadin wenten perabot dines sinah nenten cukup. Nika awanan tiang sareng Pak Made lan suka dukane sayaga nyanggra tamiune," kenten Cik Amio matur ngawakilin timpalne.
"Nggih Gung Ngurah, menengang teh. Mangkin ngiring aturin tamiune ane deriki mangda ngajengang. Niki sampun disne ngajengang,"aturne Pak Made makenyem. Gusti Ngurah makiles nyagjagin dr. Budi, Romo Ulumondo, Bidan Triana, lan ane len-lenan.
"Ngiring Pak dokter, Ibu Bidan, Romo, lan sameton samian ngiring pada ngajeng dumun. Niki samian saking rarincikan sameton suka-dukane ane nyediaang anggen pangeling-eling. Yen barang tiange sami sampun mapak mawadah peti. Benjang semeng kantun ngangkut dogen uli deriki," kenten Gusti Ngurah ngaturin tamiunne ngajengang.
Makejang lantas madaar kayahin baan Meina lan para Ibu krama suka dukane. Gusti Ngurah ajak rabinne milu ngajengang bareng ajak Pak Made lan Cik Kong Amio.Jam dasa tamiune mara pada budal. Makejang pada nyalamin Gusti Ngurah miwah rabinne saha pangapti dumadak mani puan sida matemu buin. Liu ibu-ibune ngeling mapelukan ajaka Ratna Dumilah mrasa kangen kakalahin.
278
