"Nah jalan menek malu ka taksine apang enggal teked di Kreneng, nyen nawang enu ada montor ane mulih ka Baledan," pandikanne saha menekang barang-barange.
"Ooh, nganti jam 5.00 sore kari ada montor tambangan mulih. Yen bus ja sampun majalan sidori jam 3.00," pasautne Gek Sri macelep ka taksine nyangkil Gung Nantha.
"Kenken Gek Sri milu mulih jani, apa durian? Beli maan cuti jumah tuah aminggu lantas ka Lombok aminggu mara terus pindah ka Rababima."
"Terang dong Beli Ngurah, tiang mula sampun suud ujian, mangkin milu mulih libur duang minggu. Hee pak sopir, nunas tulung singgah di jalan Serma Gede ajebos nggih, lakar nyemak tas," kenten Gek Sri melokang taksine kadununganne. Gung Nantha patimbalanga teken Meina. Cepet raganne nyemak tasne lantas mapamit teken ibu kosne. Taksine buin macuet ka Kreneng. Kabenengan kari ada montor buin abesik mara misi muatan patpat. Sesampune mayah sewan taksi barange lantas kapenekang ka montore. Jam lima sore montore lantas majalan. Pamandangane ane kaliwatin sayan sanja sayan asri katingalan. Meina jujut matakon teken Gek Sri saluiring ane tawah tepukina.
"Gek Sri, dadi ati pesan Tu Gek nganggon tiang babedan ituni di Bandara, ten pesan kene ben tiang ngingetin. Ten kenten nyud nepukin Gung Nantha nagih jemak?"
"Justru nika mbok, mawanan tiang nagih nyemak Gung Nantha. Nguda sing baang mbok? Rasanne yen buin limang menit beli Ngurah sing pesu tiang jag nyerah, sawireh tiang suba sing tahan lakar ngendong Gung Nantha ," aturne Gek Sri kenyem.
"Saja Gek Sri, ragan Tugeke mangkin sayan singset, padet maisi.
284
