Okanne masih busan-busan osah matangi. Makejang ngawe sirepne Gusti Ngurah cara mameri, sabilang ada makebiran ngelisang matangi. Nganti ngedas lemahang raganne mara maan nyriep ajebos.
Maninne semengan Gusti Ngurah sampun matangi lantas nyangkil okanne jalan-jalan di natahe. Meina masih sampun bangun ngae yeh anget lan sarapan semengan. Ratna Dumilah kari sirep. Bayunne buin lemet tuara nyidaang maklepesan, napi buin bangun. Mrasa makelo rabinne dereng matangi, Gusti Ngurah buin ka kamar ayat nundun rabinne. Dapetanga rabinne nylempang kedil-kedil, nanging ten nyidaang pesu munyi. Bayunne geles pesan. Lima batisne pesu peluh dingin. Gusti Ngurah ngaukin Meina apang ngajak okanne. Raganne lantas ngambil lengis ane aturina taken Amaq Tirah anggena ngurut ulun ati, tangan lan cokorne ane dingin cara gadebong.
"Tuagung, kenten sampun dugas raganne limuh, ten pesan nyidaang maklepesan. Panyingakanne nelik, tiang wiakti bingung. Napi mangkin ten perlu rerehang dokter?"
"Depin malu Meina, sujatinne bayunne jani gede. Len ibi mula lemet saking tuara madaar. Lamun buin atengah jam tusing bangun mara alihang dokter," pasaurne Gusti Ngurah saha menahin galeng rabinne apang manpan. Irungne masih usapine baan lengis. Ada atengah jam Ratna Dumilah mara nyidaang bangun lantas nuturang ipianne malali di rejeng-rejenge di Sengkol, lantas ada anak tua negul baan bun katang-katang di tukade. Nika awananne raganne ten nyidang maklepesan. Gumantine tali di baongne ane makeret pesan nganti ten nyidayang mangkihan. Tulung-tulung ten nyidayang pesu munyinne. Marasa teken ada ane tawah pesu uli iusan payasane, Gusti Ngurah lantas nunden David ngalih Pak Markus apang teka. Tuara makelo David sampun teka ngajak Pak Markus.
261
