Kaca:Gita Ning Nusa Alit.pdf/262

Saking Wikisource
Kaca puniki kavalidasi

"Wenten napi Pak Ngurah? Napi Ibu kumat malih, pang becik ngalihang dokter."

"Nggih, kumat Pak Markus. Sakewala rasanne ten perlu ka dokter, nanging nunas tulung alihang anak ane nawang ngubadin cara tradisional. Napi istilahne dukun, kyai, pendeta, utawi paranormal. Soalne tiang ngelah firasat sakitne niki ada hubunganne teken barang antik ane belina mara niki," baosne Gusti Ngurah saha mesuang payasan gadinge.

"Oooh nggih. Niki wiakti barang kuna, nanging biasanne malah payasane niki dados gagemet. Gading gajah, baem warak, tanduk menjangan, caling macan biasa dados ubad kuat, patin senjata muah kalung utawi okokan bayi cara lawase. Niki tawah, kok malah nyakitin. Nggih yen kenten kenken yen Romo Ulumondo, di gereja Kelana aturin meriki nyingakin. Meina mirib uning yen mepes milu misa derika," aturne pak Markus.

"Nggih Tuagung, akeh masih anake merika maubad." Aturne Meina.

"Nggih, kenken ja melahne apang enggalan seger. Nunas tulung Pak Markus ajak David ane merika," kenten Gusti Ngurah. Pak Markus lantas pesu atehanga taken David. Sesampune Pak Markus nyaritayang napi ane alamina teken bossne, saking tulus lantas Romo kayun nyingakin merika, saha piranti ane biasa anggona mubadan.

"Rarisang malinggih Romo, tiang nandan kurenan tiange mangkin meriki."

"Banggayang tiang merika yen raganne ten nyidaang matangi," pasautne Romo lantas kekamar nelokin Ratna Dumilah ane buin lemet bayunne, mara suud naar bubuh. Di kamar Romo mreksain rabinne uli

262