patulang, pang gigisan mesuang munyi. Sujatinne sing ada manganan teken lidah, ane bisa nguugang gumi. Nanging saking i lidah masih ane bisa ngawe tentram, ngawe bagia. Sangkal ati-ati ngaraos apang tusing nyakitin atin timpal. Makejang dasarin baan trikaya parisuda luire: bisa nimbangin ane katingalin, kapireng lan kerasayang baan papinah ane suci, lantas pesuang ulian omongan ane suci, salanturne buktiang ulian panglaksanane ane suci rahayu. Nah, yen suba melah baan melapanin masih nemu ane duka, lara, pati, ento madan nasib utawi titah. Mula malarapan ulian karma wasanan iragane manumadi. Sing nyandang selselang," kenten pandikanne Gusti Ngurah teken rabinne lan Meina.
"Nggih Tuagung, ampurayang tiang.Keto masih Meina maafang mbok nah. Tiang sing ngerti sabilang nganggo payasane ento liman tiange ngejer, bibih tiange iing makita ngomel. Yen uli dija kaden tekan gedeg basange," kenten raosne Ratna Dumilah sedih.
"Nah, depin malu nyanan baliin, kenken sujatinne sawireh buka raosne pak Eddy payasane tenenan mula barang antik. Nyen nawang ada tata caranne nganggon ane tuara tawang iraga," tutur rabinne saha ngaba kotak payasane genahanga di mejane di kamar. Meina teka ngaturin bossne ngajengang sawireh sodaane sampun sayaga di meja makan. Meina padidi madaar di paon tan mari angayubagia ring Tuhan Yesus lan Allah kekasih ane ngicen kadamean teken dewekne muah Gusti Ngurah sakeluarga.
Sesampune pada suud ngajengang Gusti Ngurah ngambil dupa, masila ngranasika metpetang bayu, sabda, idepne, mapinunasan ring Sang Parama Wisesa mangda ngican kaselamatan, pangampura lan pawisik napi malih sane patut kalaksanayang. Rasa wenten kleteg tuara melah saking iusan kotak gadinga lantas kisidanga ngejang di perpustakaan. Petenge nika Ratna Dumilah sirep matadah bulangsah.
260
