keto? Kaden tiang ka Kupang gumanti rapat di kantor cabang kapimpin Bapak Kakanda. Buina Meina tuunang tiang di panti asuhan mragatang urusanne indik nerima surat wasiatne. Suud rapat mara ia papagin tiang ngajak David lan pak polisi dadua ane dadi saksinne. Kali apa lantas tiang maan malaksana ane tuara-tuara. Yen sing percaya lautang takonin Meina. Tegarang jani Meina nuturang, ngujang dogen di Kupang dugase nyemak surat wasiate?"
"Dija ada maling ngaku. Apa buin yen sampun sekongkel," pasautne bangras.
"Bu, nguda Ibu nuduh tiang serong ngiring Tuagung. Kaden Ibu sane nunden tiang apang milu ka Kupang ngiring Tuagung. Tiang amung ka panti asuhan nerima surat wasiate, lantas ngantiang derika ngantos raganne rauh mapagin tiang. Wenten saksi pak polisi lan Pak David. Di panti asuhan wenten saksi suster Ida lan timpal tiange di asrama. Tiang kapingin nawang sira ke jatmane ane ngae pisuna? Yen Ibu ten percaya, ngiring saduarepang. Saking alus Ibu mituturin tiang yen tiang ngelah nyama di Cakra ane anggona panak teken Pan Kobar kaulanne Tuagung. Sujatinne kayang tiang mrasa sampun kadue teken Ibu, Tuagung, lan Gung Nantha. Nanging ten madaya baktin tiange artiang Ibu maperih lakar nguasain angganne Tuagung. Oh mama, beli Yan Galang alih tiang apang sing ngae jengah di gumine," sesambatne Meina lantas malaib ka kamarne.
"Ho ho ho, kai masih tusing madaya teken nyai mara sayangang nyicing singal nagih nyilapin bibih. Cara meonge dampingin pindang lenga abedik pasti caploka. Dija ada anak muani tahan mapuasa dampingin gibungan," kenten rabinne masesimbing.
"Nden malu madedugan denda? Nyen sujatinne ane ngelah aji pisunane ene?"
252
