"Wenten, yen ten wenten saksi matane dija lantas tiang nepukin, kene dadi jatma makurung cara blatuk makeem. Nanging sampunang Tu Rah marasa bebas nguluk-uluk awak tiange. Makejang sampun nawang alasan anake muani selingkuh pasti, ngalembur wireh gaenne matumpuk-tumpuk, rapet di hotel ajak sekretarisne, utawi torne sujatinne turu kono turu kene jumah mitranne," raosne Ratna Dumilah nyengking, nganti okanne nangis kuer-kuer satmaka ten seneng mireng aji lan ibunne miyegan.
"Nah, yen saja ada ane masadu, cobak kaukin pang sadu arepan. Mirib ia mula ngelah rencana lakar nguugang keluargan iragane. Yen sing keto sinah ia mula jatma jele, keluarganne berantakan, lantas ngora apang anak len milu uug, sing demen nepukin anak rukun. Nyen adanne? Beli meled pesan matemu taken bangsate ento," pandikan rabinne matadah garegetan. Ratna Dumilah magebras tan pasaur, lantas nyangkol okanne ajaka ka kamar. Gusti Ngurah bengong nyangongak, papinehne butek, tong madaya ada anak ane dadi ati ngricuin kulawarganne. Alon-alon raganne macelep ka kamarne masalinan lantas ka kamar mandi masiram. Suud masiram raganne ngambil canang sekar, dupa Ian tirta lantas maturan sawireh rabinne ngambul. Makelo raganne mabakti, lantas meditasi ngeningang kayunne. Mula sampun biasa raganne tuara kengguh ngarepin cobaan hidup. Malah dane kenyem nyagjagin okanne ane uyut di pasirepane lantas ajaka pesu sawireh sampun sandikala, patutne sampun masiram. Meina ningeh Gusti Ngurah ngajak okanne di wangan lantas enggal ngusap yeh paningalanne tumuli pesu nyediaang yeh siramne.
"Tuagung, nas Gung Nantha jagi siramin dumun. Niki sampun telaat kasorean," aturne Meina sedeg suaranne, saha nyemakin Gung Nantha uli ajinne.
253
