Melahan tiang pules, apang pisan-pisan sakite ilang. Kaden mangkin sampun ada Meina ane ngayahin Tuagung. Yen prade kalahin tiang mati, miribne teh kayang Gung Nantha nyidaang Meina ngempuang," kenten pasaut rabinne saha ngelut okanne ane sedeng masusu matadah ilik utawi cenidra.
"Eee, omongan apa-apaan tenenan dadi misi cara anak cemburu? Apa beneh ilike teken Meina, beneh keto? Melahang teh makeneh apang sing pati jelamut, denda?"
"Nggih, mangkin sampun apang cayakan, apang pada saduarepan. Tiang sampun uli makelo ten tahan ngrasayang kebus atin tiange. Tiang marasa awak tiange sampun rusak, layu yen bandingang teken ane kari bajang tingting. Napi malih tiang beling lantas ngelah panak nganti ten nyidaang ngladenin kurenan. Nanging kaden Tu Rah ane nuturin apang iraga mabrata malu nganti 42 lemeng sawireh awak tiange kari leteh. Ten tawang ragane ngalih singse apang maan bebas ngajak mitrane," pasaut rabinne sayan sengit. Gusti Ngurah kaplegan mireng tuduhan rabinne tan padasar. Kenten masih Meina bengong ten ngerti tuktuk bongkol omonganne Ratna Dumilah. Kapepenga baan raosne matadah nyelemper tuara ja terang-terangan.
"Sujatinne kenken sih keneh dendane? Kaden tiang sing taen kija-kija, sai jumah, sing taen malali yen sing kaperluan kantor. Sajan iraga mrataang i cening apang selamet."
"Napi, Tu Rah mabrata? Napi rereh Tu Rah ka Kupang yen ten ngalih kasempatan nyatu lega? Cumak mapi-mapi rapat. Nanging nguda rapate pas sibarengan teken Meina maan panggilan nerima surat wasiat uli panti asuhan di Kupang? Akal-akalane kenten sira ten bisa ngae alasan? Dakenan teken song kokak," raos rabinne masih sayan sengit.
"Oooh, suba uli sekat ento Ibu ngelah keneh sangsaya teken beli,
251
