"Nggih Pak dokter, uli semengan dereng ngajeng napi. Raganne amung ngoraang duurne pusing. Tiang sampun lakar nelpon Bapak nanging ten baanga. Raganne terus ka kamar nyangkutin okanne sirep. Tiang kadung iteh nindes nganti jam telu. Mara tanginin tiang jag raganne sampun lemet buka kene," aturne Meina saha ngeling sigsigan.
"Nah, lamun keto cobak sediaang susu panas lan bubuh utawi nasi belek. Buin jebos pasti inget. Apa ada masalah ajak rabinne utawi ajak anak lenan?" Patakon doktere.
"Rasanne ten wenten Pak. Tuni semengan Bapak malah pamit ka kantor di natahe, saha nunden raganne apang masiram, lan suud nginyah. Cuma ibu bengong tan pasaur, tan pegat malali kalongne," pasautne Meina nuturang wiwilan sakitne Ratna Dumilah.
Nganti atengah jam mara Ratna Dumilah inget, ngedatang paningalanne ngalih-alihin okanne. Di sampingne tingalina wenten dr. Budi, pak Markus lan pak Yosep tukang kebune. Meina kari ngaenang bubuh di paon nyambilang nyingal Gung Nantha.
"Meina, mainang Gung Nantha? Kenapa tiang niki dadi rame deriki di kamare?"
"Oh, ten kenapi Bu. Amung leleh kecapean ibi nganemin tamiu kanti sanja. Nika awananne Ibu limuh, lebihan sirep nganti engsap ngajengang," pasautne dr. Budi banban.
"Mangkin tungkasang malu nginum susune Bu, lantas ngajeng bubuh apang dadi ngajeng ubad," kenten Pak Markus saha nyemakang gelas susune paekanga ka bibihne Ratna Dumilah. Suud nginem susu Meina teka ngabaang bubuh lantas ngajengin bossne. Dokter Budi mesuang ubad duang macem apang ajenga teken Ratna Dumilah
248
