yeh panonne nrebes melusin galengne. Mara matolihan tingalina Gung Nantha okanne kenyem-kenyem kumaranen.
"Oooh, sayang maaf, ibu ten lakar nglinyokin tresnan ibune teken Ajunge sayang. Sida datun tiang, buak basang kembang matan tiange Gung Nantha, ooh." Kenten Ratna Dumilah lantas ngelut lan ngecup okanne. Kenehne nyak galangan, nanging sirahne buin makenyet sakit tan palarapan. Telapakan batisne nyeh limanne pesu peluh dingin.
Nganti jam telu Ratna Dumilah dereng masih matangi. Okanne ngoak-ngoek uyut makeengan di pasirepane. Meina ane uli tuni nyetrika dadi bingung lantas nundun bossne.
"Bu, Bu Ratna, matangi sampun jam telu dereng ngajengang," patakonne Meina saha mukak pintu kamare. Dapetanga Ratna Dumilah sampun lemet, limuh di sisin okane ane kuar-kuer nangis. Tatabina angkihanne, baliina denyut nadinne kari krasa alon pesan. Lantas ngenggalang ia nelpon Pak Markus di kantor apang enggal teka nulungin. Mara ia nyemak alkohol angon ngusapin cunguh lan muanne. Lantas buin nyemak lengis kayu putih anggona ngurut ulun ati lan lima batisne. Ratna Dumilah tetep sirep nyalepeteg. Meina nyangkol Gung Nantha lantas singala apang meneng. Limang menit lebih Pak Markus mara teka ngajak dr. Budi lantas mreksa ibunne saking telaten. Mara lantas suntika nganti ping pindo. Ratna Dumilah ngaliab maduuhan, nanging dereng nyidaang ngedatang paningalanne Dr. Budi terus ngupayaang apang inget ben ngusapin alkohol.
"Sapunapi niki Pak dokter, tiang dadi bingung ibu sirep kok dadi limuh?"
"Apa Ibu tonden madaar Meina? Bayunne geles sawireh wetengne puyung."
247
