"Araah, nunden dogen nyen sing bisa. Nanging raganne tan pawirenga masih yen kurenane sakit. Cobak, payu masih luas," kenten raosne Ratna Dumilah matadah sugal. Meina makesyab bengong tumben ningeh Ratna Dumilah ngopak rabinne di dori. Kaden ituni rabinne saking alus pamit masuk tur ngorahin apang masiram, suud nginyah?
"Ooh, wenten napi niki Bu? Yen jakti sakit depin tiang nelpon dr. Budi utawi Pak Markus di kantor apang mapagin meriki. Tiang takut padidi yen Ibu nyanan kenapa-napi tiang benduina teken Tuagung," aturne Meina matadah bingung, takut, paling limanne.
"Nah, depin suba lakar pulesang mirib nyak ilang sakitne. Mungpung masih Gung Nantha sirep," pasautne Ratna Dumilah lantas ka kamarne masare nyangkutin okanne. Makelo Meina bengong, nanging inget teken gegaenne liu, ngumbah prabot, nyetrika pakaian, lan popok, lantas ia kapaon majumu uli ngumbah prabote ane momos matumpuk.
Ratna Dumilah glibag-glibeg di pasirepane tuara nyidayang masare. Kenehne inguh, limanne ngetor sabilang ngisi kalung gadingne inget teken tuturanne Hendun yen misanne mangkin dadi Pak Camat di Sengkol. Marawat-rawat mamiq lan inaqne ane ngaptiang apang ia dadi Insinyur Pertanian, ngabdi tanah leluhur tur ngenyakin misanne apang tetep jele melah di balen papuq baloqne. Mangkin raganne sampun dadi jalma murtad, tan ngidepang tutur rerama. Yen ten kenten sinah kari kuliah di Mataram, paling sial dadi kurenan Pak Camat, ngisiang gumi Mandalikane. Timbang mangkin dadi tukang tunggu paon cara blatuk makeem dengak dengok uli gooke doang. Ngataun, duang taun buin mapindah-pindah cara meong makisid ngajang panakne. Pidan lakar ngurusang inaq lan mamiqne. Kenten lamunanne nrawang, ten rasanina
246
