Maninne Gusti Ngurah, semeng sampun matangi. Olah raga di taman ajebos lantas masiram. Rabinne ngindengang okanne ngalih angin di sisin telagane. Meina repot di paon nyediaang bossne wedang lan sarapan. Nganti jam 7.30 Gusti Ngurah lunga ka kantor, rabinne kari negak di sisin telagane. Sebengne suntru tan pateja, tanganne ngripit malali kalong lan gelang gadinge cara ada ane tawah rasanne nganggo payasan dantane.
"Bu, Nantha, aji masuk nggih? Suud nginyah amonto, melahan masiram malu apang seger rasanne! Daag sayaang." kenten Gusti Ngurah ngecup okanne lantas luas. Meina ngenggalang nyediaang yeh siramne Gung Nantha lantas ngorain Ratna Dumilah.
"Bu Ratna, yeh sirame sampun sediayang tiang di kamar mandi," raosne alon tur kapaon ngalanturang gegaenne ngangetin be siape, ngorengin be guling lan ngae jukut. Sisan kacang kumalindunge basanina uyah, sera, asem anggon panyelah ubad nyelabne. Saking itehne masak tuara tawanga saget sampun jam 10.00. Ratna Dumilah sampun suud nyirepang okanne, mara ka meja makan ningalin sarapanne sampun dingin.
"Meina, mai malu jemak sarapane. Tiang sing madaar, basange nyeb."
"Ngudiang ten Bu, niki sampun jam dasa. Raga masusuin nyanan seduk."
"Aah, sirah tiange masih sakit, keneh tiange jag inguh gati. Gedeg, meriik tahu?"
"Yen kenten melahan telpon dr. Budi apang meriki, nggih Bu? Kaden Gung Aji mabesen kenten. Utawi telpon Pak Markus yen perlu ka rumah sakit," pasautne Meina.
245
