lan be guling kayang basanne, saha sisan lawar lan sesate. Kelep-kelep padidiana madaar di paon. Ratna Dumilah milu nyemak piring isinina nasi ajak kritik be guling lan sesate. Gusti Ngurah ngetep tulang iga utawi langsaran gulinge ane gebuh.
"Bareng magibung Bu, tiang nyud teken langsarane. Yen be guling mula dini pupulan jaenne, rasan basane nyusup di mulukne susun daging," kenten Gusti Ngurah saha ngesopin rabinne atebih. Sepanan makelid rabinne negor tanganne, mapi tuara tau.
"Beh, kaden ja tulang iga Tuagung. Jakti merasaan niki timbang kulitne." Sang kalih payu magibung saling esopin. Meina sledat-sledet makenyem, tambis kasimpatan. Suud madaar Meina nampedang piringe momos di pangumbahan piringe. Gusti Ngurah ajak rabinne ngisis di terase ngajeng jeruk lan anggur. Meina masih milu ngorta ngajum kenakan rasan lawar lan be gulinge, nanging tetampen rabinne matadah cenidra.
"Bu, yen kene kalah tiang masak bandingang teken Pak Made lan Pak Cenik."
"Beh, yen buat masak nuju rainan lan upacara adat di Bali mula anake muani ane ngarapin. Anake luh-luh amung teka matulung majejahitan ngae banten lan jaja dogen," pasautne Ratna Dumilah nuturang kabiasaan banjare di Bali. Liu pada reraosanne indik masak memasak, adan bebanten, saha artin upakara telubulanan ane kalaksanayang ituni. Jam dasa sesampune nyelepang kursine ka ruang tamu, makejang lantas ngojog kamarne suang-suang. Saking lelehne mara enteganga sirahne di galenge Meina sampun ngorok. Di kamar, Ratna Dumilah ajak rabine napetang okanne uyut majongjang, popokne belus lantas kasalinin. Nganti tengah lemeng mara pada sirep lelep ngapit okanne.
244
