"Dadi Cik Amio, asal tusing di dinane masuk kantor. Pak Made lan
Pak Cenik pasti nyak dadi belawanne," pasautne Gusti Ngurah briukina
teken Pak Made matutang.
Sawireh sampun nyaluk sanja, saka ukud tamiune nunas mapamit
saha nyalamin Gusti Ngurah ajak rabinne. Makejang ngaku liang, puas
kenehne ngrasayang masakan Bali Sasake macampuh dadi sadrasa
ngulangunin. Pak Markus, Pak Made, Pak Cenik, Ian David ajak
kurenanne suang-suang ane siduri mulih makejang pakabaina nasi lan
ebe teken Ratna Dumilah anggon keluarganne jumah, sawireh sisan
masakane kari liu. Pak Made nunas tendas gulinge dogen, sawireh
awakne kayang pukanganne telah litig.
"Yen tiang niki tendas guling ayabanne Gung Nantha lakar tunas,"
kenten Pak Cenik saha ngetep tendas gulinge di perpustakaan wadahina
waskom baanga kurenanne. Makejang mangkin pada mapamit budal.
Kari Meina ane matetamped nyampilang sisan sate, be siap wadahina
waskom. Gusti Ngurah milu nektek be gulinge, pukang-pukanga apang
elahan ngejang wadahina waskom. Banten ayabane ketoga teken Ratna
Dumilah. Jaja, wohwohan, kapilah-pilah kawadahin sokasi suang-
suang, apang tingkes tongosna Meina munduhang be gulinge ane kari
masisa langsaran ajak basanne dogen di waskome.
"Beh, Meina kanggoang be gulinge apukang dogen ane sepelanga
teken Bu Made ituni di lemarine. Takut sing maan nyicipin, maan bagian
tulang-tulangne doang," kenten raosne Ratna Dumilah saha mesuang
be gulinge uli lemari makane. "Neh, enu tileh kok."
"Beh yen kenten melahan tiang madaar malu. Basang tiange
sampun seduk gati, bes tumben gelek-gelek ngadek bon be gulinge.
Ibu sareng Gung Aji kaden mara abedik ngajeng sareng tamiune ibusan.
Malih ja ngajengang," pasautne Meina lantas nyemak piring isinina nasi
243