3x1 tablet sesai. Suud ngajeng bubuh lan ubad mara mrasa melahan bayunne lantas negak.
"Nggih yen sampun melah rasanne Bu tiang mapamit dumun ka kantor," aturne dr. Budi lan Pak Markus sibarengan makire pesu uli kamare. Ratna Dumilah tuun uli pasirepane lakar ka kamar mandi dandahina teken Meina nyambil nyingal Gung Nantha.
"Nggih Pak dokter lan Pak Markus, matur suksma tiang ngarepotin Bapak dogen."
"Badah, sampunang sungkan-sungkan. Yen perlu jag bel langsung ka RSU utawi yen peteng kumah tiange. Tiang pasti rauh sajaba alangan. Telaat yen kanti ngalih mobil ka BRI malu. Napi malih Pak Ngurah ten wenten di kantor," raosne dr. Budi negesang lantas pesu atehanga teken Pak Markus ka Rumah Sakit Umum.
Suud mresihin raganne di kamar mandi, Ratna Dumilah malinggih di kamar tamu sambilanga ngemban okanne. Meina nyampat di kamar tan mari setata nguratiang Ratna Dumilah ane mangku okanne nyambil mamaca surat kabar. Montore magerung langsung macelep ka garasane Meina cepet nyagjagin nyemak tas lan bukunne abana ka kamar. Gusti Ngurah gageson nyagjagin rabinne malinggih lesu ngabin okanne di kamar tamu.
"Kenken Bu, sampun melahan bayune?" Patakenne Gusti Ngurah alon.
"Kenapi tiang, dados Tuagung matakon kenten? Tiang sehat, tegteg, ten buduh."
"Sing ja buduh. Kone mara Ibu maan limuh. Pak Markus ane ngoraang di kantor."
"Ooh, nika? Tiang ten ja limuh, kewala engsap bangun kadung
249
