mara jam solas siang.
Sapaninggal Hendun uli umahne, Ratna Dumilah mrasa ada ane ngusak asik hatinne. Tuturanne Hendun mirib ada benehne. Di arisan para istri kepala dinese liunan ane ngrumpi, nuturang indik kurenanne ngelah mitra, gajihne tuara genep mulih, ngelah madu, demen mamotoh, mapunyah-punyahan, nganti ada ane melag endahang kurenane. Liunan ane ngorahang keweh ngelah pembantu bajang, mepesan ia dadi pangempahan nafsu kurenanne yen katuju ia malangan, utawi sedeng baling gede. Napi buin ane ngelah kurenan mepes torne ka daerah-daerah setata sangsaya, takut yen kurenanne ngalih lonte utawi mabuaka sedianga be matah teken pejabate corah satmaka tombokan apang aman. Beh, kene kotor pagubugan para sujanane ane patutne ngayomin wangsa, nanging jatinne ia ane mamangsang ngulurin momo angkarane. Kenten manahne Ratna Dumilah samben mabulet kakilinin tuturne Bu Kirno ngusak-asik. Tuara rasanina yeh panonne nrebes mili melusin galengne. Kasuen-suen raganne nyriep sirep nyangkutin okanne ane masih lelep.
Tumben nganti jam dua siang okanne mara matangi. Raganne masih milu matangi mrasa otengne seduk sawireh ituni amung naar jaja gagodoh bareng Bu Kirno tamiunne.
"Bu, ngajeng malu!" "Depin tiang ngendong Gung Nantha pesu," Raosne Meina saha nyemak okanne indenganga di terasa Ratna Dumilah lesu ngojog kamar makan madaar.
"Aaah, basange enggalan seduk. Tuagung pasti buin torne," raosne geting.
"Nggih, kaden Gung Aji sampun mabesen yen nganti jam dua dereng rauh dados sampun kalahin ngajengang. Mirib sajaan raganne torne," aturne Meina matu eling. Ratna Dumilah cepet madaar matulud
232
