pesu tan mari nyledetin Meina ane sedeng nyemuhang payama kayang pakean dalemne Gusti Ngurah, tututina taken Ratna Dumilah teked di pamesune.
"Sing pelih omongan tiange busan, yen anak suba kasemsem biasanne tusing lek, malah demen ngumbahang pakean dalem gelanne maka cihna tresnanne. Ento awananne liunan anake luh ane ngumbah lan nyetrika pakean dalem rabinne padidi."
"Ah, ia sampun tiang anggap panak padidi. Ia masih kenten arepe teken tiang." Kenten pasautne Ratna Dumilah mapi tuara ilik, saha nguratiang Bu Kirno menek mobil. Magerus mobil boks rokone ilang uli panyawangne. Ratna Dumilah maekin Meina ane kari nyabunin seprei lan sarung galenge, lantas raganne milu nulungin nyemuh popok okanne. Penese dauh telu rasa makenyet di sirahne. Peluh di gidatne Meina pakeritis paketel-tel paseleet di moa lan tundunne. Bajunne ane belus baan peluh nempel ketat di awakne. Pamulunne gading kacoklatan kena sinar surya, ngawe pipinne masawang baag. Ratna Dumilah ngituk ngiwasin. "Saja ke Tu Ngurah tusing kasemsem nepukin bajang jegeg buka kene? Abahne mirip pesan Made Sinar." Kenten grenggenganne alon. Meina matolihan ningalin bossne nulungin majemuhan, lantas ngelangsehang umbah-umbahane.
"Depin dogen Bu!" "Panese beeng pesan, nyanan tiang nyemuhang," raosne Meina.
"Sing kenken Meina, nanging melahan spreine dogen jemuh dini. Pakean dalemne Tuagung lan popokne Gung Nantha melahan jemuh di dori dogen. Maih tulungina nyen." Kenten Ratna Dumilah nulungin Meina nintingang panyemuhane abana kadori. Suud majemuhan mara ia mandus lantas masalinan. Ratna Dumilah nyagjagin okanne matangi. Alon raganne nupdupang okanne, kajangkutin, kapasusuin sawireh
231
