nawang nyanan nyak pesu yeh susune," aturne Meina saha nyemak botol susune paekanga ka bayine. Makejang liang, demen ningalin bayine klecot-klecot nyusu saking bedakne.
Ngawit sorene nika magilih ada dogen timpalne Gusti Ngurah, pegawene, nasabah, tentara, polisi ane nelokin. Umah dinese dadi rame. Para istri pegawene saling genti teka nulungin. Sabilang semeng bidan Triana teka nyiramang bayine. Nanging yen sore Meina lan Ratna Dumilah melajah nyiramang kaabih baan bidan Triana uli ngurutin minyak telon, matekesin puser, nyabunin, nyelebang lan ngisi bayine di tengah yehe. Niisang ben anduk, mupurin, menahin tali puserne, masang gurita, popok, baju bayi, kaos tangan lan cokorne. Mara duang lemeng Ratna Dumilah sampun nyidayang masusuin. Yeh susunne boot sawireh raganne rajin naar jukut don tui lan kacang tanah manyahnyah. Sabilang rarene masiram yeh siramne masih kasiramang di pendeman ari-arine. Sabilang peteng kasundihin sentir utawi lilin saha kabantenin ben miyik-miyikan. Nganti makepoan mara Gusti Ngurah maan slah nulis surat teken ibu lan rai-rainne di Bali, matuanne di Sengkol, lan ipahne di Praya ngabarang yen okanne lanang sampun selamet lahir dugas dina Buda Wage Klawune. Ibu lan rarene pada rahayu seger oger.
Limang dina makelonne puser bayine sampun kepus. Telah sampun bagian sang catur sanak sane ngatut ring sang rare. Kenten masih sampun kapatut ngawentenang pabresihan ring sanggar, plangkiran, ring dapur, ring jeding wiadin sumur, tur majumu ngaenang kumara linggih Bhatara Kumara maka pangempu ring duur pasirepan rarene. Sawireh Gusti Ngurah lan rabine kari maraga sebel, upakarane kalaksanayang olih ibu-ibu istri tentrane uli Bali ane ada derika, ane ngaenang banten ngalepas awon, banten kumara, perayas cita, labaan sang ibu, lan banten sang ari-ari. Lantas kagaenang pretiti nyihnayang bayine mangkin sampun
204
