Meina yadiapin tugasne sayan berat ngumbah lan nyetrika baju lan popok bayi, nanging kenehne liang sawireh ngelah momongan lucu lan boss ane sayang teken dewekne. Ia masih tuara engsap teken panti asuhan ane ngubuhin dewakne dugase kalahina mati teken mamenne, nganti ia tamat SMP tur magae dadi pambantu di umah Kepala BRI Kupang, tur mangkin pindah ka Atambua. Sabilang ia narima gajih, yen ada pagawe BRI ka Kupang ia ngirim pipis ka panti asuhan seadanne satmaka anggon tali asih teken para sustar lan timpal-timpalne.
Tumben siang nika ada surat uli panti asuhan katiba teken Meina Victoria abana teken tukang Pose. Mara bukaka lantas bacana, isinne nunden apang Meina teka ka panti asuhan dinane mani sawireh ada surat wasiat ane lakar serahanga teken Suster Ida kepala panti asuhane teken Meina. Kategesang ane nerima mesti apang Meina Victoria, tuara dadi wakilang. Meina enggal ngedengang surate teken Ratna Dumilah.
"Bu Ratna, tiang polih surat uli panti asuhan, apang tiang ka Kupang benjang nerima surat wasiat saking memen tiange. Bah surat wasiat napi malih niki Bu?" Aturne Meina saha nyerahang surate teken Ratna Dumilah.
"Naah, Meina. Nyen nawang ada pabesen memena apang sustere nyerahang wasiate disubana Meina kelih, cukup umur. Kaden buin mani kabenangan ulang tahun Meinane ane ka pitulas? Nah, dumadak mani ada montor kantore ane ka Kupang," kenten pasautne Ratna Dumilah saha matolihan ningalin rabinne mara rauh uli kantor.
"Surat apa ento Bu?" Patakan rabinne nyingak surat di tangan Ratna Dumilahe.
"Surat panggilan Maena apang ka Kupang banjang ngambil surat wasiat saking mamanne, ane kasimpan olih suster Ida di panti asuhan. Buina tan dados wakilang."
207
