"Ooh jakti Bu Ana, malah tiang ane dereng nawang unduke nika," raos rabinne.
"Enggih, tiang melajah telung tiban di RSUP Sanglah Denpasar. Kabenengan dugas nika Pak Ngurah dadi pasien tiange di Zaal D. saking nyungkanang panyingakan. Telu bulan raganne opname. Kocap dereng melah segerne raganne sampun mulih, kangen teken pacarne, ha ha ha ....," pasautne bidan Triana masemu guyu.
"Nggih, Tu Ngurah taen nuturang kocap di rumah sakit liu ngelah pacar ane nulungin macaang surat, ngesopin nasi, ngelapin dugase dereng dadi ka kamar mandi."
"Beh, mula sampun kenal uli pidan? Bagus yen kenten. Kalian dadi nyambung pasuwitrayane mangkin pada-pada sampun ngelah kulawarga deriki," raos doktere saha maang recep anggon ngawewehin ubade. "Selamet, selamet, dumadak rahayu."
"Matur suksma dok, tiang pamit siang niki. Yen sapunapi tiang ngebel dokter malih," Gusti Ngurah lan rabinne nyalamin doktere ane majalan pesu uli kamarne. Gusti Ngurah ngorain rabinne lan Meina mataki-taki, lantas pesu ngojog ka ruang Tata Usahane lakar mabayahan. Surat-surat ane perlu kanggon ngenepin susunan keluarga dadi urusang dorian. Sesampune makejang pragat lantas pesu mapamit uli rumah sakit malon-alonan rikala jame nujuang jam setengah satu siang. Teked jumah Gusti Ngurah tuun ngamaluin lantas nyemak saagan kanggon mapag oka lan rabinne di pamesune. Meina ane nyangkil bayine lantas ngojog ka kamar nyirepang bayine di boks bayine ane sampun kasediaang derika. Anake alit makeliud kecap-kecap nagih susuin. Ibu lan ajine saling peliwat nyemakang susu botol sawireh Ratna Dumilah dereng pesu yeh susunne.
"Banggayang tiang Bu. Becikan Ibu mresihin susune malu, sira
203
