lantas kacakupang. Di sisinne kaisinin koangen, bunga miik macem lima, dui-dui, eduk lantas kabungkus baan kain putih matulisin Ang, Ung, Mang. Kagaenang bangbang di arepan pintune kenawan, dalemnemalengen, mara ari-arine katanem, katetehin batu, lan kapulain pandan. Maka aturan pang sakewala ada canang sari, lan segehan kepelan petang kepel mabe uyah, bawang, jahe. Makejang kalaksanayang olih Gusti Ngurah ngaraga. David lan kurenanne amung ngalihang sarananne dogen sawireh ia masih tuara ngerti. Nah makejang sampun pragat. Dupane malepug miik ngalup nutdut kayun. Sesampune suud ngajengang raganne lantas ka kantor BRI. Dapetanga Pak Markus sedeng mragatang gagaene. Encen ane perlu tandatanganine teken Gusti Ngurah pejanga di mejanne. Pegawene lenan sajabaning pesuruh pada sampun mulih.
"Pak Ngurah nguda malih ka kantor, niki dados ambil benjang dogen."
"Ah, ten pak Markus. Yen nandatanganin tenenan ajebos dogen pragat. Kenken kase, cukup? Nyidaang mayah kredite ane janjiang ibi?" Gusti Ngurah mataken aris.
"Sampun Pak, kabenengan panunggake sane cingakin Bapak sami naur. Malah Cik Kong Amio sumpun mayah limang juta, maan kiriman nyamanne di Surabaya. Nika awananne ipun ten durus ngadol trukne," pasautne Pak Markus saking kendelne. Sapuput karyanne Gusti Ngurah lantas medal lakar ka rumah sakit. Pak Markus masih milu. Teked di RSU Pak Markus nyalamin Ratna Dumilah:
"Selamet bahagia Bu. Maaf tiang ndewek, nunut Bapak meriki. Manawi malih jebos ibu-ibu barengan meriki. Beeh, moleh putrane, rambutne selem tur samah pisan," aturne Pak Markus mara ningalin okanne sirep di boks bayine di sampingne.
200
