"Matur suksma Pak Markus, silakan derikian negak. Mirib niki ibu-ibune teka," pasautne Ratna Dumilah sambilanga nyerere para istri pegawene ane marerod teka. Ibu Markus ane dadi panua nyerahang bungkusan saha nyalamin Ratna Dumilah lan rabinne saking tulus asih, "Selamet Bahagia, dirgahayu nyambut putrane kapertama."
Salanturne makejang pada liang magegonjakan saling caritayang pengalamanne dugase ngelah pianak. Liu ane ngajumang indik aluhne Ratna Dumilah ngelahirang okanne, nyakit tuah telung jam sampun embas. Yen anak lenan bisa nganti dua waian. Petenge nika Gusti Ngurah nongosin rabinne di Rumah Sakit. Meina ngijeng diumah dines sambilanga ngumbah pakeane ane kotor ajaka Ibu David, saha yiapang nasi anggon sarapan bossne mani semengan. Pegawene magilihan teka milu magadang nganemin Gusti Ngurah nganti tengah lemeng, tur lanturanga teken David makelemah. Tuara waneh-waneh Gusti Ngurah nyingakin okanne. Busan-busan bandinganga teken rabinne ane masih sirep lelep gati.
"Oooh, I Cening presis gati cara Denda, ibunne. Cunguh, alis, rambut, bibih lan pamulune, oh sayang sida sampun maang tiang rare ane bagus tosning menak Jonggat," Gusti Ngurah makeengan saha menahin saput rabinne Ratna Dumilah ngeliab kenyem.
"Wenten napi Tu Ngurah, dados tiang nunas susu agelas? Tiang bedak gati."
"Susu, dadi nguda sing. Yen seduk maem masih dadi," pasaur rabinne makekat ngambil gelas lantas nyeduh susu matimpal roti manis. Alon-alon raganne ngesopin roti katulud baan susu. Mula saja seduk nganti nelahang roti a bungkul lan susu a gelas.
"Tu Ngurah, yen kene rasanne madak mani tiang baanga mulih teken doktere. Elahan rasanne tiang jumah apang bebas maan ngurus
201
