"Selamet sayang, denda kuat lan tabah. Uli jani iraga saja-sajaan suba dadi ibu lan aji beneran. Rambutne i cening nyelem, samah precis cara ibunne"
"Nggih,sakewala gantengne cara ajikne. Matur suksma duh Hyang Widhi sane sampun ngicen momongan," aturne masemu sendu. Gusti Ngurah ka kamar mandi lakar mresihin ari-arine. Sesampun rarene bresih lantas kasirepang di boks bayine. Kenten masih ibunne kapindahang ka kamar VIP apang dadi bareng ngajak bayine.
"Nah, Denda sirep malu dini tongosina teken Meina. Tiang mulih malu lakar nanem ari-arine. Yen perlu apa-apa satonden tiang teka orahin Meina ngubungin bidane utawi telpon mulih." Gusti Ngurah ngecup rabinne lan nyingakin okanne lantas pesu nengteng ember misi ari-arine saha buntelan pakeane kotor abana teken sopire.
"Pak, pakean kotore rendem dogen, nyanan tiang sane ngumbah, "raosne Meina.
"Pak Ngurah, napina okane? Niki napi mawadah ember?" Patakonne David.
"Lanang, Vid. Ene ari-arinne lakar tanem jumah jani apang pragat," pasaurne Gusti Ngurah lantas menek ka montore maseret enggal ka umah dinese. Raganne enggal nelpon Pak Markus di kantor gorahang rabinne sampun ngalahirang di rumah sakit. Miribang jam dua raganne mara nyidayang ka kantor. Mangkin kari nanem ari-ari di umah dines saha pula-paline. Pak Markus masih ngucapang selamet berbahagia.
Gusti Ngurah sujatinne sampun uli ibi nyiapang piranti lakar nanem ari-arine. Sesampune bresih maumbah ben sabun miik, ari-arine lantas kacelepang ka nyuhe ane mabelah dadi dua matulisin Ongkara ane duuran lan Ahkara ane betenan, kisinin anget-anget,
199
