ane nanganin kaabih baan bidan Triana Zebu ane mula sesai mareksa bobotane.
"Sapunapi Dok kawentenan kurenan tiange?" Pitakenne Gusti Ngurah jujut.
"Aah, sehat. Pas pisan sampun bukaan lima. Mangkin lantas ka kamar bersalin. Dumadak enggal lahir. Waah, Bu Ratna mula sehat tur tenang pisan jaga ngalahirang." Bidan lan perawate lantas nyorog Ratna Dumilah ka kamar bersalin. Gusti Ngurah tundena ngantosang di sisi. "Yen perlu nyanan dados masuk," raos bidane nyapsapang.
Gusti Ngurah malinggih di bangkune di sisi. Busan-busan buin matangi, majalan kangin-kauh saha nyingakin jam "Nah suba jam solas jani. Madak apang enggal lekad i cening, pasti lakar muani yen lekad tengai tepet," kenten raganne ngrenggeng, kenyem. Meina milu makenying kloncing. Bidan Ana Zebu saget pesu ngaukin Gusti Ngurah:
"Ayo, Pak Ngurah. Bayine sampun lakar lahir. Ibu pingin apang Ajikne ane nyambut putrane kapertama," raosne Bidan Ana saha nandan Gusti Ngurah macelep. Rabinne sedeng nyeden kaawasin baan doktere ... satu... dua ... sikit lagi Bu, ...naah." Gusti Ngurah nyingakin rarene mablelos pesu kacandak teken doktere. Ratna Dumilah mambekan panjang lega gati nagih nyingakin okane, nanging andeganga teken bidane, sawireh kari kategesin tali puserne. Bayine nangis "greeerg ...oek, ooek, ngooek."
"Niki Pak, Bu Ngurah bayine lanang, sehat pisan." Doktere lantas nyerahang bayine teken bidan Triana ane lakar nyiramin apang bresih. Ari-arine lantas kawadahin ember abana teken perawate ka kamar mandi. Gusti Ngurah matur suksma teken dokter lan bidane saking tulus, saha maekin lantas nyium rabinne saking welas asih.
198
