sampun nyediaang tamas, sampian, buu utawi lis, lan teenan ental, sawireh tau yen mantune dereng bisa ngae padidi. Yadiapin ada okanne nanging raganne ten biasa majejaitan. Ratna Dumilah masih rajin nyatet ane perlu-perlu manggon tetandingan banten pasesaian.
Sambilanga gakgak gukguk ngedekin raganne padidi pati usud matanding, Ratna Dumilah busan-busan mukak catetan, buku pedoman bebanten apang ten pelih.
"Tu Ngurah, becikan jejaitan rontale niki dogen anggen. Yen wenten kirangan mara gaenang ben busung. Manawi niki cukup sejaba canang sari lan katipat kelanane"
"Saja Denda, miribne ibu suba nyediaang makejang ane sulit-sulit ben rontal. Yen bantek canang, katipat, aledan, daksina kayang byakala mirib bisa iraga ngaenin," kenten Gusti Ngurah saha mesuang jejaitan rontale makejang uli sokasine kabresihin. Ratna Dumilah nunden Meina ngelablab katipat lan nyakan acukupan ukuran selae diri.
Jam telu sore tandingan bantene sampun pragat. Istri-istri pegawene sajaba ane matulung sampun liu teka lakar nyaksiang upacarane. Kenten masih sameton Bali ane dadi tentra di Atambua milu teka matulung mabanten lan meakalain Ratna Dumilah. Suud mabyakala, mabakti lan natab banten, lantas kalanturang acara masiram di natahe. Gusti Ngurah nyibak klungah nyuh gading anggon nyiramin rabinne, saha nyendok yeh siramne. Magilihan pada nyiramin Ratna Dumilah baan yeh kumkuman lan bunga kembang rampe sarwa miyik limang macem nganti ngilgilang, saha doa:
"Dumadak mangda rahayu, bayine sehat nutugang tuuh, apang lekad selamat."
Sesampune suud masiram lantas masalinan sawireh lakar dadi
184
