dagang rujak lan cendol, miwah jaja laklak, nagasari, lan bubuh sumsum. Ane mabelanja tuah tamiune makejang. Marebut pada mabelanja, takut ten kebagian rujak lan cendol. Ada aji seribu, limang tali, malah ada ane aji dasa tali satmaka anggon adiah teken bayine di garbha. Jam lima upacarane pragat lantas tamiune katurin madaar di teras lan ruang tamune ane sampun kasediaang teken Meina lan para istri pegawene ane pada repot nulungin masak. Pakeremos pada madaar saha angayubagia ring Sang Hyang Widhi utawi Allah Sang Maha Kasih apang Gusti Ngurah lan rabine kicen selamet nyambut putra pertama. Sore tamiune pada mapamit kadulurin antuk ucapan suksmaning idep olih sang kalih. Mangkin kari Meina matetamped ngumbah prabot sambilanga gendang gending. Gusti Ngurah nulungin rabinne ngetog banten, nampedang sampian entale kawadahin sokasi.
"Meina, tulungin nyelepang ketogan bantene di lemari makan. Yen tataban tiange ento ja depin di meja makan lakar daar tiang padidi pang telah sing dadi miluin."
"Beh, Bu Ratna daya. Pantes buahne, jajanne, lan panggangan ayame pilihina ane paling enak, nggih Pak? Yen kenten layuban ane di kamar nika dados tiang nunas?"
"Dadi, nguda sing. Banten katur ring Sang Hyang Widhi utawi Allah Sang Maha Kasih, asal manut kenehe Allah ane Meina sembah patuh teken Sang Hyang Widhi ane sembah tiang. Nanging yen Meina nganggap Allahmu beda teken Sang Hyang Widhi ku, nah terserah," kenten Gusti Ngurah negesang apang Meina ngerti sasuduk bantene.
"Tapi agaman tiange sareng Bapak kaden mabeda tata cara lan kapercayaane."
"Beneh, nanging eda salah tampi yen tiang nerangang abedik. Liu anake nutur, indik ubungan paturu umat magama patut saling
185
