"Ooh jakti niki Bu, Pak kayun nuduk kalacuran tiange?" Sautne kenyem manis.
"Nguda tiang ocuk-ocuk. Tiang merluang timpal ane jemet, dueg cara Meina."
"Nggih, nggih Bu, tiang janji ngiring Ibu kija ja pindah, kayang netep di Bali," kenten raosne Meina lantas maserod makakeb di pabinanne Ratna Dumilah, ngeling.
"Nah, terima kasih Meina. Tiang lega kamu nyak milu. Suud ngeling, jani jalan madaar malu sawireh suba peteng," Gusti Ngurah ngusap sirahne Meina lan rabinne. Petenge karasa hening. Ratna Dumilah ngurut-urut tangan rabinne ane sebuh aji balsem. Gusti Ngurah ngusuh-usuhin weteng rabinne saha nuturin, apang setata tragia, tenang ngarepin masalah apang rarene di garba selamet, milu tenang, wekasan dadi manusa sregep, pageh puguh mayadnya. Di kamare lenan Meina osah ngalamun, nyawangang lelampahan idupne yen saja lakar nutug bossne ngalanglang buana uli gumine tanggu kangin nganti .....aah tan merasa lantas pules aris gati.
Kabenengan dina Minggu nuju purnama, sampun nem bulan tuuh bobotanne Ratna Dumilah, patut ngadakang upacara magedong-gedongan maka panyucian lan pangentegan rarene di garban ibunne. Dumadak yen tutug ulananne selamet lekad dadi manusa ane bhakti teken yayah rena, tansah maguna di masyarakat, wangsa, lan agamane. Sasida-sidaan raganne ngae banten upacara, di plangkiran ngunggahang pejati lan ajuman. Kanggon pasucian kagaenang byakala, prayascita lan tataban sesayut pamahayu tuuh. Sedeng melaha ibunne
183
