babijan, pipis logam, amung taluhne dereng mawadah lantas gaenanga katipat taluh.
"Nah, denda mula seleg malajah, buktine suba beneh lan sampiane jegeg buka ane ngae. Nyen ngadenang denda mara malajah," Gusti Ngurah ngajumang rabinne.
"Nggih, sira malu gurunne. Mangkin ngiring malu ngajeng, basang tiange sampun seduk. Ibu-ibu patulunge sampun tunden tiang madaar maluan," atur rabinne saha mukak tudung sajine di mejane. Sang kalih lantas ngajengang kakawitin mantra amukti bukti boga nunas karahayuan. Suud ngajengang Gusti Ngurah lantas mayasin plangkirane aji kain putih kuning, lamak, cenigaan, lan don kayu. Jam empat mara pada masiram madabdaban lakar mabanten. Mapayas lelunakan, masaput kuning Gusti Ngurah makta bokor misi toya anyar lan tirta pelukatan maketis milehan nganggo ambengan.
Rabinne menekang banten perani, kelanan lan daksina di pelangkiran kamare muah di ulun pekarangane. Suud malukat Gusti Ngurah lantas ngenjit dupa, ngantebang bantene nunas laluputan lan keselametan ring Ida Sang Hyang Widhi Wasa, mina kadi sang sapa sira ugi ane milu nongosin derika. Salanturne rabinne mabanten canang di paon, di kamar tamu, di pasepelan, di semer muah di pangapit lawange. Mara sang kalih lantas mabakti di pelangkirane di kamar. Suud matirta Ratna Dumilah buin ngalanturang masaagan di kamar, di tengah natahe, lan di arepan pemesune. Alep sebengne ngeset don, matabuh, nyambehang baas lan ngayabang saagane. Ibu-ibu patulunge bengong pakerimik mabalih.
Sampun pragat upekarane Ratna Dumilah nunden Ibu David masedia kopi lan jaja kanggo patulunge makejang. Kabenengan masih Pak Markus teka ajak kurenanne.
169
