pada teka uli peken meli woh-wohan, bunga, jaja muah ane lenlenan. Ratna Dumilah mesuang jejahitan lantas nanding banten sakesidan luire: prani 2 tanding, kelanan lan daksina 2 tanding, canang genten 5 tanding, canang sari 10 tanding, saagan 3 tanding. Liang manahne ningalin tetandingan bantene, sampianne mabunga bungah sarwa miyik, woh-wohane nasak ngedotang ati. Patulunge lantas katunden madaar malunan.
Jam dua siang Gusti Ngurah rauh uii kantor. Rabinne nyemakin tasne abana ka kamarne. Seneng kayunne Gusti Ngurah nyingakin kamar-kamarne sampun rapi, asri katingalan. Di pasirepane sampun sedia kamben lan baju anggon pasalinan. Gusti Ngurah enggal ngeles pakean dinasne lantas masalinan.
"Tu Ngurah, kanggeang malu amuniki matamped. Indayang cingakin yen kari kirang rapi benjang malih becikang," atur rabinne saha nandan ka kamare ane lenan.
"Ooh cukup asri. Ulian tuara ngelah prabot kanggoang malu amun ene. Kenken bantene, nyidayang Denda nyambilang matanding? Apa cukup maan bunga lan busung?"
"Niki kari mabanjah di mejane. Indayang cingakin, napi patut kenten? Tiang kari nginget-ingetang ane nikaina ring ibu," pasaut rabinne saha nandan ka mejane di paon. Gusti Ngurah nyingakin tandingane bantene saja bungah. Isin peranine magenepan, utamanne woh-wohan dademenan rabinne, luire sumaga, apel, biu susu, poh, muah anggur. Nasi kaput, sambel saur, kacang komak, taluh mapindang, ayam goreng pada mawadah cemper. Ada masih krupuk melinjo, jaja uii magoreng, mangkok lan nagasari mara lebeng. Sampiane mabunga sarwa miyik, sandat, cempaka, jempiring, jepun, pacar galuh, lan samsam maura gumitir. Daksinane masih sampun tegep misi nyuh, biu matah, baas,
