"Ooh, sampun puput upacarane Pak Ngurah?" Patakonne lantas negak di terase. "Sampun Pak Markus. Niki amung upacara saderana, satmaka nunas kaselametan maka ciri tiang dadi warga deriki. Silakan meriki di kamar tamu negak," Gusti Ngurah nerangang indik upacarane ane mara kalaksanaang taken tamiunne Ibu David nyacarang kopi lan jajane di mejane lantas ngaukin Pak Yosef lan David apang milu negak ngobrol.
"Pak Markus lan Ibu, tiang merluang pembantu apang ada ajaka nutur, nulungin kurenan tiange di paon lan mabelanja. Padalem jumah padidi dereng kenal taken sira-sira. Buina dereng nawang tongos peken, hargan barang, basa lan siman gumine cara deriki." "Oh antuk nika, nggih Pak Ngurah. Nanging sadereng polih pembantu, manawi ta Ibu David nyak nongosin Ibu Ngurah deriki. Kaden panake sampun kelih-kelih, ten buin ngarepotin jumah. Kenken Pak David lan Ibu?" aturne Pak Markus ajak kurenanne.
"Nggih dados, tiang amung repot nyakan semengan dogen. Suud nika nganggur. Banggayang tiang meriki bareng pakne lan siang yen Bapak sampun mantuk tiang masih mulih milu pakne," pasautne Ibu David nyanggupin. Ratna Dumilah liang kayunne nerima katulusanne Ibu David. Napi malih pak David milu lega maan nulungin bossne.
"Matur suksma Ibu-ibu, tiang kari malajah idup cara deriki. Madak Ibu-ibu ten med nelokin tiang meriki, utamanne Ibu David," kenten Ratna Dumilah makenyem. Pak Markus lan Ibu-ibune lenan lantas mapamit budal. Gusti Ngurah ajak rabinne ngatehang teked di pamesune Ibu David nutug kurenanne saha matur teken Ratna Dumilah. "inggih Bu Ratna, ngawit benjang semeng tiang sampun nyarengin Ibu deriki."
170
