lan bangawan, dumadak sida nganti teked katanggun segarane tan patepi. Dumadak tresnan iragane masih tan patepi," kenten pandikanne saha ngecup lamben rabinne alon. Ratna Dumilah ngaliab, kenyem tan mari ngawales ngecup rabinne, kadopdop, kapeluk, magulungan di batan sapute nyepukang cumbuana rasane. Diwangan ujan ririse masereok ampehang angin. Katake pada girang saling tembungin matembang pangkur. Krejepan bintange mangu kasmaran matadah iri.
Maninne semengan buka biasanne Gusti Ngurah sampun matangi lantas ngojog kamar mandi masiram. Suud masiram raganne maekin masirepane lakar nundun rabinne. Alon-alon bukaka saputne, pecika irungne mara Ratna Dumilah ngaliab lantas matangi.
"Beeh, Tu Rah nakal. Nguda mara nundun tiang. Aah, tiang kalembang, satata kalah cepet bangun. Tiang kari malajah apang tangen, apang nyidaang ngayahin Tu Rah,"
"Oh, sing kenken sayang, ne mara jam enem, tusing ada apa ane lakar gaenin. Buina denda tepukin tiang leleh tur lelep gati. Iraga enu di hotel, sarapan masih uli hotel. Nah, kayang suba di umah dinase silak bae mula denda miak napi sapatute, denda enges." Gusti Ngurah lantas nandan rabinne ane kari uyuk-uyuk ka kamar mandi.
"Kenken, pandusin tiang Ratna? Kene enu ngidem uyuk-uyuk?"
"Nggih dong, salah Tu Rah ngalahin tiang masiram maluan," rabinne nyerahang raganne nagih siramin. Gusti Ngurah ngalah lantas nyiramin rabinne saking welas asih. Suud masiram lantas magenti panganggo sawireh pelayan hotele ngabarin sarapane sampun cumawis. Sang kalih lantas sarapan matimpal kopi susu lan taluh mata sapi. Suud sarapan lan mayah sewan hotel lantas mataki-taki mesuang barang lakar makisid ka umah dinase dinane mangkin. Tuara makelo ngantiang David sopir kantore teka mapagin. Barang-barange lantas kapenekang
166
