tamas, katipat lan daksina, apang mani kari nanding dogen.
Jam lima makejang piranti bantene sampun pragat lantas kapejang di lemari makan, apang buin mani semengan elah ngarapin lan matanding.
"Nah, Ibu-ibu buin mani tulungin tiang masak lan mabelanja ka peken, anggon ngae banten a tanding. Tiang buin mani payu nyelepin umahe niki, yen cara Bali perlu ngadaang slametan saderana. Barang- barang tiange semengan sampun maba meriki. Nah mangkin cukupang malu amuniki," kenten Ratna Dumilah ngorain ibu-ibu patulungne. Makejang lantas budal sajaba tukang kebune ane kari nancebang carang dapdap di ulun pekarangane anggon sanggah penganggih. Gusti Ngurah ajak rabinne mulih ka hotelne.
Saking lelehne mabresih-bresih, Ratna Dumilah selidan suud madaar sampun maluan nyalempang sirep aris pesan. Gusti Ngurah pesu moraan teken manajer hotele yen buin mani lakar pindah ka umah dinase, lan beaya hotele makejang lakar kabayah buin mani.
"Oh, Bapak Ngurah tausah repot banget. Kitorang nasabah BRI silakan bayar kalo sampun ada pipis ka rekening kitorang di kantor BRI," atur manajer hotele masemu guyu.
"Ah, niki urusane gampang, asal baang rincianne akuda patute mayah. Selamat malam, tiang lakar ngaso malu," pasautne Gusti Ngurah saha makiles ka kamarne. Petenge sayan sepi, amung di kadohan kapireng munyin kuluke nyalung ulun-ulun ngelad prana. Sasampune magenti nganggo piyama Gusti Ngurah lantas sirep di sisin rabinne. Makelo raganne bengong nyingakin rabinne sirep aris makenyem cara rarene kumaranan.
"Ooh, sayang Denda. Lascarya tresnan dendane nuduk lacur tiange, nutug I Lara ngentasin tragtag lantang, rejeng iding, nuut tukad
165
